వర్షాభావంతో రైతన్నకు కష్టకాలం.. మొలకెత్తిన విత్తనాలు ఎండిపోతున్నాయని ఆవేదన
మన భారత్, ఆదిలాబాద్ రూరల్:
ఆదిలాబాద్ జిల్లాలో వర్షాలు సకాలంలో కురవకపోవడంతో రైతులు తీవ్ర ఆందోళనకు గురవుతున్నారు. ఆశతో విత్తిన పంటలు మొలకెత్తినా, తదుపరి వర్షాలు లేకపోవడంతో అవి ఎండిపోయే పరిస్థితి నెలకొంది. దీంతో రైతులు పెట్టుబడులు కోల్పోయి తీవ్ర నష్టాలను ఎదుర్కొంటున్నారు.
ఆదిలాబాద్కు చెందిన రైతు గంజివార్ పురుషోత్తం తన ఆవేదనను వ్యక్తం చేస్తూ, గత ఏడాది అతివృష్టి కారణంగా పంటలు దెబ్బతిన్నాయని, ఈసారి మాత్రం అనావృష్టి రైతులను కుదేలు చేస్తోందన్నారు. ప్రకృతి వైపరీత్యాలు వరుసగా వెంటాడుతుండటంతో వ్యవసాయం చేయడం రోజురోజుకూ భారంగా మారుతోందని వాపోయారు.
ఈ ఖరీఫ్ సీజన్లో ఇప్పటికే రెండుసార్లు విత్తనాలు విత్తాల్సి వచ్చిందని, ప్రతి సారి వర్షాలు కురుస్తాయనే ఆశతో సాగు చేపట్టినా వాతావరణం సహకరించక మొలకెత్తిన విత్తనాలు ఎండిపోతున్నాయని తెలిపారు. విత్తనాలు, ఎరువులు, దున్నింపు, కూలీల ఖర్చులతో భారీగా పెట్టుబడులు పెట్టినా ఆశించిన ఫలితం లేక అప్పుల ఊబిలో కూరుకుపోతున్నామని చెప్పారు.
జిల్లాలో పలుచోట్ల ఇదే పరిస్థితి నెలకొన్నట్లు రైతులు చెబుతున్నారు. తగినంత వర్షపాతం లేక పంట పొలాలు ఎండిపోతుండటంతో భవిష్యత్పై ఆందోళన వ్యక్తం చేస్తున్నారు. వ్యవసాయానికి పూర్తిగా వర్షాలపై ఆధారపడే రైతులు వెంటనే విస్తృతంగా వర్షాలు కురవాలని ఎదురుచూస్తున్నారు.
రైతులు ప్రభుత్వాన్ని ఆదుకోవాలని కోరుతున్నారు. పంటల పరిస్థితిని వ్యవసాయ శాఖ అధికారులు క్షేత్రస్థాయిలో పరిశీలించి, నష్టాలను అంచనా వేసి అవసరమైన సహాయం అందించాలని విజ్ఞప్తి చేస్తున్నారు. వర్షాభావ పరిస్థితుల నేపథ్యంలో ప్రత్యామ్నాయ పంటలపై అవగాహన కల్పించడంతో పాటు, అవసరమైతే ఇన్పుట్ సబ్సిడీ, పంట బీమా పరిహారం వంటి చర్యలు చేపట్టాలని కోరుతున్నారు.
ప్రకృతి పరిస్థితులు అనుకూలించకపోవడంతో రైతాంగం తీవ్ర ఇబ్బందులు ఎదుర్కొంటున్న ఈ తరుణంలో, రానున్న రోజుల్లో మంచి వర్షాలు కురిసి పంటలు గట్టెక్కాలని రైతులు ఆశాభావం వ్యక్తం చేస్తున్నారు.
మీ గొంటి ముక్కుల ప్రసాద్ రిపోర్టర్ మన భారత్
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి
